ԹԱՆԳԱՐԱՆՆԵՐ ԵՎ ՊԱՏԿԵՐԱՍՐԱՀՆԵՐ

Հայաստանի Պատմության Թանգարան

Հայաստանի պատմության թանգարանի առաքելությունն է Հայաստանի և հայ ժողովրդի պատմությունն ու մշակույթը ներկայացնող թանգարանային առարկաների և հավաքածուների պահպանումը, համալրումը, ուսումնասիրումը և հանրահռչակումը:

Հիմնադրվել է Հայաստանի առաջին հանրապետության խորհրդարանի ընդունած օրենքով: Կոչվել է Ազգագրական - մարդաբանական թանգարան - գրադարան: Այցելուների համար բացվել է 1921թ. օգոստոսի 20-ին: Կազմավորվել է Կովկասիհայոց ազգագրական ընկերության, Նոր Նախիջևանի հայկական հնությունների թանգարանների, Անիի Հնադարանի, Վաղարշապատի Մատենադարանի հավաքածուների հիման վրա:

Հայաստանի պատմության պետական թանգարանում պահպանվում է շուրջ 400000 առարկայից բաղկացած ազգային հավաքածու` ամբողջացնելով Հայաստանի` նախապատմական ժամանակներից եկող մշակույթն ու պատմությունը:

ԱՅՑԵԼՈՒԹՅԱՆ ՄԱՍԻՆ ՏԵՂԵԿԱՏՎՈՒԹՅՈՒՆ

Թանգարանի ներկայիս մշտական ցուցադրական տարածքներում կարող եք տեսնել Արենիի քարանձավից գտնված հնագույն ոտնամանը (Ք․ա․ 3600-3500 թթ.), վաղբրոնզեդարյան բնակարանի վերակազմությունն ու Շենգավիթի ծիսական օջախը (Ք․ ա․ 29-26-րդ դդ․), Գեղարոտի վզնոցն (Ք․ ա․ 29-26-րդ դդ․) ու հնագույն ոսկե հերակալները (Ք․ա․ 35-26-րդ դդ․), Քարաշամբի դրվագազարդ բացառիկ արծաթյա գավաթն (Ք․ա․ 23-22-րդ դդ․) ու Վանաձորի ոսկյա գավաթը՝ առյուծների պատկերներով (Ք․ա․ 19-18-րդ դդ․), Լճաշենից պեղված դամբարանների վերակազմությունները՝ փայտե դիակառքերով (Ք․ա․ 15-րդ դ․), երկաթեդարյան գոտիներն ու արեգակնային համակարգի խորհրդանիշները (Ք․ա․ 11-9-րդ դդ․), ուրարտական արքաների, այդ թվում` Արգիշտիի, Սարդուրիի, Ռուսայի վահաններն ու սաղավարտները, Երևանի հիմնադրման արձանագրությունը, վաղ հայկական տաճարի մոդելն ու զինվորիկների ծիսական արձանիկները, Արտաշես արքայի սահմանաքարերն ու Տիգրան Մեծի դրամները, Աֆրոդիտե աստվածուհու մարմարե քանդակը, Արտաշատից պեղված խճանկարի բեկորները և բազմաթիվ այլ եզակի և բարձրարժեք նմուշներ։

Տոմսեր կարող եք գնել տեղում, ինչպես նաև առցանց։

ԺԱՄԵՐԸ ԵՎ ՄՈՒՏՔԸ