ՊԱՏՄԱՄՇԱԿՈՒԹԱՅԻՆ ՇԵՆՔԵՐ

2004 թ.

Ճարտարապետներ՝ Ջիմ Թորոսյան, Ռոմիկ Մարտիրոսյան

Կոնստրուկտոր՝ Հենզել Հակոբյան, կառուցապատող՝ Գագիկ Գալստյան

ՀՀ պետական մրցանակ՝ 2007 թ.

Շենքը գտնվում է Հրազդան գետի ձախափնյակում՝ Արգիշտի փողոց, 1 հասցեում:

Երևանի քաղաքային խորհրդի գործադիր կոմիտեի (քաղաքապետարանի) վարչական նոր շենքի շինարարությունը, ԽՍՀՄ կառավարության որոշմամբ, սկսվել է 1984 թ.: Նախագծի հեղինակն էր ճարտարապետն Ջիմ Թորոսյանը: Շենքի կառուցումը եղել է հանրապետության ղեկավարության մշտական ուշադրության կենտրոնում: Հաճախ շին.հրապարակ են այցելել ՀԿԿ Կենտկոմի առաջին քարտուղար (1974-1988) Կարեն Դեմիրճյանը, ՀԽՍՀ Մինիստրների խորհրդի նախագահ (1977-1989) Ֆադեյ Սարգսյանը, Երևանի քաղխորհրդի գործկոմի նախագահ (1975-1985) Մուրադ Մուրադյանը: Շինարարական աշխատանքները շարունակվել են մինչև 1991 թ., այնուհետև, հանրապետությունում տիրող իրավիճակի հետ կապված, դադարեցվել են: Քաղաքապետարանի նոր շենքը վերանախագծվել է 12 տարի անց՝ 2003 թ.: Ջիմ Թորոսյանի նախագիծը պահպանվել է, բայց հարմարեցվել է ժամանակի պահանջներին: Շինարարությունը շարունակվել է 2003-ից՝ շուրջ 15 ամիս, և 2004 թ. նոյեմբերի 26-ին շենքը հանձնվել է շահագործման:

Նախկինում նախագծված քառահարկ շենքի փոխարեն կառուցվել է 5-հարկանի շենք, վերանախագծվել է 47 մ բարձրությամբ աշտարակը:

2002 թ. ՀՀ կառավարության որոշմամբ նոր շենքի մի հատված տրամադրվել է Երևանի պատմության թանգարանին: Վերջինս, որն այդ ժամանակ տեղակայված էր Մ. Մաշտոցի պողոտայում (Ստ. Շահումյանի անվան N 1 դպրոցի տարածքում), 2005 թ. տեղափոխվել է նոր շենք: 2007 թ. ապրիլի 3-ին բացվել է թանգարանի հիմնական ցուցադրությունը։

Շենքն ունի 5 հարկ, ընդհանուր մակերեսը 13,5 հազար քառ. մ է: Կառուցված է ազգային ճարտարապետության ավանդույթներով: Ճակատը հարդարում են ռելիեֆային քանդակները, Կենաց Ծառի պատկերը, Երևանի հատակագիծը և այլն: Նեղ որմնախորշերում տեղադրված սյուների վրա փորագրված են Հայաստանի մայրաքաղաքների անունները: Կառուցված է նարնջագույն, սրբատաշ տուֆից:

Նախագծի ճարտարապետներ Ջիմ Թորոսյանն ու Ռոմիկ Մարտիրոսյանը (հետմահու), կոնստրուկտոր Հենզել Հակոբյանն ու կառուցապատող Գագիկ Գալստյանը 2007 թ. արժանացել են ՀՀ պետական մրցանակի:

 «Պատմամշակութային ժառանգության գիտահետազոտական կենտրոն» ՊՈԱԿ

Երևանի քաղաքապետարան