ՊԱՏՄԱՄՇԱԿՈՒԹԱՅԻՆ ՇԵՆՔԵՐ

XX դ. սկիզբ

Պետ. ցուցիչ՝ 1.6.206.6

Ճարտարապետ՝ Իոանիսյան

Տունը գտնվում է Արամի և Տերյան փողոցների անկյունում՝ Արամի փողոց, 44 հասցեում:

1896 թ. անշարժ գույքի գնահատման տեղեկագրի համաձայն՝ պատկանել է Թիֆլիսի բնակիչ Գրիգոր Տեր-Նիկողոսյանին: Միհարկանի էր՝ կառուցված տուֆ քարից: Տանիքը ծածկած էր թիթեղով: Հատակն ու պատշգամբը փայտից էին, առաս­տա­ղը՝ գաջով սվաղած:

1901 թ. նոյեմբերին Տեր-Նիկողոսյանը տունը վաճառել է Ֆադեյ Թադևոսյանին, ով էլ հետա­գայում (1910-1911 թթ.) կառուցել է երկրորդ հարկը: 1923 թ. օգոստոսին շենքն ազգայնացվել է և հանձնվել նորաստեղծ կոնսերվատորիային, որն այստեղ գործել է մինչև 1930-ական թթ. վերջը: 1930-ական թթ. կառուցվել է եր­րորդ հարկը: Հետագայում՝ մինչև 1964 թ., շենքում գործել է հեռակա մանկավարժական ինստիտուտը (հետագայում՝ Փիլիսոփայության և իրավունքի ինստիտուտ):

Տունն ունի Г-աձև հատակագիծ (23.6 x 18.9 մ): Հիմնական մասնա­շենքում սենյակները դասավորված են երկու առանցքով, որոնք ուղղված են դեպի հարավ-արևմուտք (Արամի փողոց): Կողային թևում սենյակ­ները նույնպես երկշարք են և գլխավոր մասնաշենքի հետ հաղորդակցվում են ներքին միջանցքով: Ծավալատարածական հորինվածքում առանձնանում են փողոցահայաց երկու ճա­կատ­նե­րը, որոնց հատման տեղն ընդգծված է կիսաշրջանաձև աշտարակով: Վերջինս ավարտ­վում է թեփուկաձև քանդակներով հարդարված գմբեթով: Պատշգամբներն ունեն մետաղե, ցանցկեն, նուրբ ճաղաշար:

Շենքի ներսում պահպանվել են գունավոր հախճասալիկներով շարված պատի վառարան­ներ: Կան պատի հայելավոր պահարաններ:

Շենքը բավականաչափ փոփոխություններ է կրել: Երրորդ հարկ կառուցելու պատճառով շինությունը զարդարող աշտարակն առանցքով վերև է փոխադրված: Փայտե, բարձրաքանդակներով դռները փոխարինվել են երկաթե դռներով: Ներքին միջնապատերը վնասել են պատի վառարանները:

Շենքն արժեքավոր է որպես ճարտարապետության հուշարձան: Պատմա­կան նշանակությունը կայանում է նրանում, որ 1920-1930-ական թթ. այստեղ է գտնվել կոնսերվատորիան:

 «Պատմամշակութային ժառանգության գիտահետազոտական կենտրոն» ՊՈԱԿ

Երևանի քաղաքապետարան