ՊԱՏՄԱՄՇԱԿՈՒԹԱՅԻՆ ՇԵՆՔԵՐ

1949-1950 թթ.

Պետ. ցուցիչ` 1.6.164

Գլխավոր մասնաշենքի հեղինակ՝ ճարտարապետ Մարկ Գրիգորյան

Երկրորդ մասնաշենքի հեղինակ՝ ճարտարապետ Մ. Ռուստամյան

Պատվիրատու` Հայաստանի կոմունիստական կուսակցության Կենտրոնական կոմիտե

Գտնվում է Մարշալ Բաղրամյան պողոտա 19 հասցեում՝ պողոտայի կարմիր գծից 100-120 մ ներս՝ բարձունքի վրա:

Հիմնական մասնաշենքը նախագծվել է 1946-1947 թթ., կառուցվել է 1949-1950 թթ.՝ որպես Կենտկոմի վարչական շենք: Հեղինակն է ճարտարապետ Մարկ Գրիգորյանը (ԽՍՀՄ պետական մրցանակ 1951 թ.): 1967 թ. հեղինակը, ճաշարանի մասնաշենքը վերակառու­ցելով, վրան ավելացրել է հարկ, որը 1982 թ. ավարտել է ճարտարապետ Հ. Դոխիկյանը, կապելով այն հիմնական մասնաշենքի հետ:

Շենքը Կենտկոմը զբաղեցրել է մինչև 1991 թ.: Նույն տարվա մայիսից այն հատկացվել է ՀՀ Գերագույն խորհրդին (այժմ՝ ՀՀ Ազգային ժողով):

2006-2009 թթ. Ազգային ժողովի հիմնական մասնաշենքին կից կառուցվել է 2-րդ մասնաշենքը: Նախագծում փորձ է արվել այդ մասնաշենքի ճարտարապետությունը հարմարեցնել հիմնականի հետ և դրանց միասնությունը դարձնել համահունչ: 

Հիմնական շենքը կառուցված է բաց դեղնավուն սրբատաշ ֆելզիտից, միդիս շարվածքով։ Երկրորդ մասնաշենքն ամբողջությամբ բետոնակառույց է՝ երեսապատված հիմնական մասնաշենքի ֆելզիտային տուֆի  գույնի և որակի քարերով: Ներքին տարածությունների հարդարման համար օգտագործվել են բարձրորակ փայտն ու արհեստական շինանյութերը: Ճակատներում կիրառված են հարդարման բազմապիսի միջոցներ. բացվածքները եզերված են հայկական ճարտարապետության ավանդական զարդանախշերով: Կենտրոնական ճակտոնի վրա մինչև 1991 թ. եղել է Վ. Ի. Լենինի կիսադեմի հարթաքանդակը, որը հետագայում փոխարինվել է ՀՀ պետական զինանշանի քանդակով:

Շենքն առջևից չորս, իսկ ետևից հինգհարկանի է։ Տարածքը բարեկարգված է, կանաչապատ և ծառաշատ:

Շենքը խորհրդահայ ճարտարապետության լավագույն վարչական կառույցներից է, աչքի է ընկնում մոնումենտալությամբ, արտահայտչակա­նությամբ, ֆունկցիոնալ նպատակահար­մա­րությամբ, ազգային և դասական ճարտարապե­տու­­թյան ավանդույթների օգտա­գործմամբ:

 2019 թ. բրիտանական Independent թերթը ՀՀ Ազգային ժողովի շենքը ներառել է աշխարհի ամենագեղեցիկ խորհրդարանների կառույցների տասնյակում՝ 4-րդ հորիզոնականում։           

«Պատմամշակութային ժառանգության գիտահետազոտական կենտրոն» ՊՈԱԿ

Երևանի քաղաքապետարան