ՀՈՒՇԱՐՁԱՆՆԵՐ
ՀՈՒՇԱՐՁԱՆ ԿՈՄԻՏԱՍԻ
1988 թ.
Պետ. ցուցիչ՝ 1.6.124
Ճարտարապետ՝ Ֆենիքս Դարբինյան
Քանդակագործ՝ Արա Հարությունյան
Հայ մեծանուն երգահան, երաժշտագետ, մանկավարժ, խմբավար Կոմիտասը (Սողոմոն Սողոմոնյան, 1869-1935) հայկական ազգային կոմպոզիտորական դպրոցի հիմնադիրն է: Նա ձայնագրել է մի քանի հազար երգ՝ մոռացումից փրկելով հայ ժողովրդի ստեղծած երաժշտական մշակույթը և այն ներկայացրել է աշխարհին՝ ապացուցելով, որ հայն ունի ինքնուրույն ազգային երաժշտություն: 2024 թ. հունվարի 29-ին ՅՈՒՆԵՍԿՕ-ի գործադիր խորհրդի միաձայն որոշմամբ Կոմիտասի ստեղծագործությունների հավաքածուն գրանցվել է Աշխարհի հիշողության միջազգային ռեգիստրում:
Կոմիտաս վարդապետի
հուշարձանը տեղադրված
է քաղաքի
կենտրոնում, Սայաթ-Նովայի պողոտայի եզրին,
երգահանի անունը
կրող Կոնսերվատորիայի շենքի առջև կազմակերպված պուրակում: Բացումը տեղի է ունեցել
1988 թ. հունվարի 8-ին:
Կոմիտասի 3 մ բարձրությամբ բրոնզաձույլ արձանը տեղադրված
է գրանիտե կլոր հարթակի վրա: Քանդակը
պատկերում է 1915 թ.
Հայոց ցեղասպանության
արհավիրքներն ապրած,
վշտահար ու մտահոգ, ձեռքերը ծնկներին դրած մեծ հայորդուն՝ նստած
արմատախիլ եղած,
բայց դեռևս
հողին կառչած,
չորացած ճյուղերով ծառի բնին: Կերպարը կառուցված է իր ներաշխարհի մեջ խորասուզված մարդու նուրբ մշակված դիմաքանդակի և իրանի ընդհանրացված ձևերի
համադրությամբ: Հորինվածքին բնորոշ է մասշտաբայնությունն ու քնարականությունը:
«Պատմամշակութային ժառանգության գիտահետազոտական կենտրոն» ՊՈԱԿ
Երևանի քաղաքապետարան
