ՊԱՏՄԱՄՇԱԿՈՒԹԱՅԻՆ ՇԵՆՔԵՐ ԵՎ ՎԱՅՐԵՐ
Նախկինում՝
ԻՆՏՈՒՐԻՍՏ, ԵՐԵՎԱՆ
Հյուրանոցը
գտնվում է Աբովյան 14 հասցեում՝ Շառլ Ազնավուրի հրապարակում։ Կիսակլոր հորինվածքը ենթարկված
է հրապարակի կոնֆիգուրացիային։ Սկզբնապես այն կոչվել է «Ինտուրիստ», ապա՝ «Երևան»,
իսկ 2023 թվականից՝ Գոլդեն Թուլիփ Գրանդ Հոթել։
1928–1935
թթ․ շենքի երկրորդ
հարկի լյուքս սենյակներից մեկում ապրել է նշանավոր բանաստեղծ Եղիշե Չարենցը։
Շենքը
կառուցված է XX դ․ սկզբի (1910-ականներ) ռուսական նեոկլասիցիզմի ոճով։ Սկզբում նախատեսված
է եղել կառուցել եռահարկ շենք, սակայն շինարարության ընթացքում ավելացվել է չորրորդ
հարկը, որը փոխել է կառույցի ճարտարապետական լուծումը։
Հորինվածքում
գլխավորն է կիսակլոր անկյունային մասը՝ չորս զույգ սպիտակ, հոնիական ոճի սյուներով,
որոնք միավորում են պատշգամբի մեջ խորացող երկրորդ և երրորդ հարկերը։
Այս
մասում բացված գլխավոր մուտքը տանում է դեպի ընդարձակ նախասրահ, որտեղ տեղադրված է
պլաստիկորեն թեքվող եռաերթ աստիճանավանդակը։ Կողային ճակատի (Աբովյան փողոցի ուղղությամբ)
և ամբողջ առաջին հարկի գլխավոր թեման կիսաշրջանաձև կամարներն են, որոնք ձևավորում են
խանութների ցուցափեղկերը, ծառայողական սենյակները և ռեստորանը։
Առաջին
հարկի ճակատում շարվածքը տուֆից է։ Երկրորդից չորրորդ հարկերում պատերի հարթությունները
սվաղված են աղյուսագույն սվաղով, իսկ սյուները՝ սպիտակ գույնով։ Պատերի ֆոնին առանձնանում
են սև տուֆից և մոխրագույն բազալտից քիվերի, պատուհանների շրջանակների և պատշգամբների
ճարտարապետական տարրերը։
1959
թ․ հյուրանոցին
արևելյան կողմից կցակառուցվել է Նկարիչների տունը՝ գլխավոր ցուցասրահով (ճարտարապետ՝
Ռաֆայել Իսրայելյան)։ Ցուցասրահի ճակատը լուծված է որպես հյուրանոցի ճակատի շարունակություն։
Գոլդեն
Թուլիփ Գրանդ Հոթել հյուրանոցը Հայաստանում խորհրդային կարգերի հաստատումից հետո կառուցված
առաջին հյուրանոցն է՝ ժամանակակից հայկական ճարտարապետության մեջ նեոկլասիցիզմի ուղղության
վառ օրինակներից մեկը։
