ԹԱՆԳԱՐԱՆՆԵՐ ԵՎ ՊԱՏԿԵՐԱՍՐԱՀՆԵՐ
Պետ. ցուցիչ՝ 1.6.172
Ճարտարապետներ՝ Մարկ Գրիգորյան, Էդուարդ Ալթունյան
Շենքը գտնվում է Յա. Զարոբյան փողոց, 3 հասցեում`
ՀՀ Սահմանադրական դատարանի հարևանությամբ:
Տուն-թանգարանի համար հիմք է ծառայել այն միահարկ առանձնատունը, որտեղ Երևան ժամանելիս իջևանել է աշխարհահռչակ հայ երգահանը: Առանձնատունը 1947 թ. Արամ Խաչատրյանին է նվիրել Խորհրդային Հայաստանի կառավարությունը։ Այստեղ ապրում էին նրա մայրն ու եղբայրը՝ ընտանիքով։
Առանձնատունը (ճարտարապետ՝ Մարկ Գրիգորյան) բաղկացած էր հինգ ընդարձակ սենյակներից և ուներ տնամերձ այգի։ Այն տուն-թանգարանի վերածելու որոշումը ՀԽՍՀ Մինիստրների խորհրդը կայացրել է 1976 թ. հուլիսի 21-ին՝ Ա. Խաչատրյանի կենդանության օրոք։ Առանձնատունը պահպանվել է անփոփոխ, իսկ նրան համալրող տուն-թանգարանի երկհարկանի շենքը կառուցվել է այգու տարածքում: Պահպանվել է մի փոքրիկ ներքին բակ, ուր Ա. Խաչատրյանի ծննդյան 105-ամյակի կապակցությամբ (2008 թ.) կառուցվել է հուշաղբյուր, որը ճարտարապետներ Սարգիս Գուրզադյանի և Ս. Բարսեղյանի նվերն է թանգարանին: Մարկ Գրիգորյանի մահից (1978 թ.) հետո գործը շարունակել է ճարտարապետ Էդուարդ Ալթունյանը:
Թանգարանի պաշտոնական բացումը տեղի է ունեցել 1982 թ.: Գործել է մինչև 1985 թ. սեպտեմբերը, որից հետո վերանորոգման նպատակով մի քանի տարի չի գործել:
Առաջին ցուցադրությունը բացվել է 1984 թ. հունվարի 23-ին։
Տուն-թանգարանում հավաքվել են ավելի քան 18 հազար արժեքավոր առարկաներ՝ լուսանկարներ, նամակներ, գրքեր, նոտային ձեռագրեր, ստեղծագործությունների տարբեր հրատարակություններ, ֆիլմեր, ձայնագրություններ, անձնական իրեր, փաստաթղթեր, ազդագրեր, բուկլետներ և այլն։ Այստեղ կազմակերպվում են միջոցառումներ՝ փառատոներ, հուշ-երեկոներ, մրցույթներ, հանդիպումներ մշակույթի գործիչների հետ, կազմակերպվում են ցուցահանդեսներ, հայ ժամանակակից երգահանների ստեղծագործությունների պրեմիերաներ։ 2006 թ. ՀՀ կառավարությունը ձեռնարկել է տուն-թանգարանի շենքի հիմնանորոգումը, 2008 թ. հունիսի 6-ին բացվել է տուն-թանգարանի նոր մշտական ցուցադրությունը:
Երկհարկանի, նկուղով, ներքին բակով (14 x 14 մ), ատրիումային տիպի թանգարանային շենք է, որի բոլոր մասերը փոխկապակցված են և կազմում են միասնական ճարտարապետական-հատակագծային համակարգ: Նկուղային հարկում պահպանվում են եզակի լարային գործիքներ, ֆոնդային նյութերը: Այստեղ են լուսանկարչական լաբորատորիան, երաժշտական գործիքների վերանորոգման արհեստանոցը: Առաջին հարկում գտնվում են նախասրահը, ձայնադարանները, վարչական սենյակները, երկրորդ հարկում՝ 10 ընդարձակ, մշտական ցուցասրահները (լուսավորվում են ներքին բակի կողմից) և համերգասրահը (գտնվում է նախկին տան վրա):
Տուն-թանգարանի կառուցվածքային համակարգը բաղկացած է երկաթբետոնե
տարրերից: Գլխավոր ճակատում պահպանվել են նախկին տան ճակտոնով մուտքը և 2 կամարակապ
լուսամուտները:
Շենքի ճակատային մասում՝ ամբողջ կառույցի
բարձրությամբ կառուցված են կամերտոն հիշեցնող 5 կամարներ:
Շենքը կառուցված է Անիի տուֆից, կամարները
տրավերտինից են: Չափերն են՝ 35 x 27մ:
«Պատմամշակութային ժառանգության գիտահետազոտական կենտրոն» ՊՈԱԿ
Երևանի քաղաքապետարան
ԱՇԽԱՏԱՆՔԱՅԻՆ ԺԱՄԵՐ
Երկուշաբթիից - ուրբաթ՝ 11:00-17:00
Շաբաթ` 11:00-16:30
Կիրակի՝ փակ է
ՄՈՒՏՔ
Մեծահասակներ - 1500 դրամ
Դպրոցականներ, ուսանողողներ, թոշակառուներ - 800 դրամ
ԷՔՍԿՈՒՐՍԻԱ
Հայերեն – 3000 դրամ
Անգլերեն, ռուսերեն, գերմաներեն – 4000 դրամ
