ՊԱՏՄԱՄՇԱԿՈՒԹԱՅԻՆ ՇԵՆՔԵՐ ԵՎ ՎԱՅՐԵՐ

1944, 1952

Գտնվում է Ծովակալ Իսակովի պողոտայում:

Գործարանի եռահարկ գլխավոր մասնաշենքի շինարարությունը սկսվել է 1949 թ. և ավարտվել 1952 թ.։ 1953 թ. կոնյակի արտադրությունը, վերջնականապես առանձնանալով Երևանի գինու-կոնյակի-օղու գործարանից, տեղափոխվել է նորակառույց շենք, որտեղ թողարկվել է առաջին արտադրանքը։ Որպես շինանյութ հատուկ ընտրվել է կոնյակի գույնը հիշեցնող կարմիր տուֆը։

Պատերին՝ տուֆե մակերեսների վրա, տեղադրված են պատմական թեմաներով որմնաքանդակներ, որոնց հեղինակը քանդակագործ Արտաշես Հովսեփյանն է։

Գլխավոր մասնաշենքի կողքին գտնվում է համանման ճարտարապետական լուծումով վարչական շենքը։

Տարիների ընթացքում, արտադրության ընդլայնմանը զուգահեռ, կառուցվել են փորձասենյակների մասնաշենքը (1975), որտեղ տեղավորված են նաև ցուցասրահը և համտեսի սրահը, ինչպես նաև կուպաժային արտադրամասերը (1989)։ Ճարտարապետներն են Սերգեյ Ներսիսյանը, Բաղդասար Արզումանյանը և Աշոտ Ալեքսանյանը։

Բոլոր շենքերն ունեն ժամանակակից և հայկական դասական ճարտարապետական ձևերի համադրված լուծումներ։

Արտադրական կառույցների ճարտարապետության հետ ներդաշնակորեն համադրվում են համալիրի տարածքում գտնվող դեկորատիվ-կիրառական արվեստի գործերը (քանդակագործ-խեցեգործ՝ Հռիփսիմե Սիմոնյան), վաստակաշատ կոնյակագործ Մարգար Սեդրակյանի հուշարձանը (1975), ինչպես նաև 1579 թ. կերտված՝ Հին Ջուղայի հայկական մեծ գերեզմանատնից բերված պարոն Փիրբաշխի խաչքարը։

1998 թ. գործարանը սեփականաշնորհվել է և ընդգրկվել «Pernod Ricard» միջազգային խմբի կազմում։