ՊԱՏՄԱՄՇԱԿՈՒԹԱՅԻՆ ՇԵՆՔԵՐ

1950-ական թթ.

Շենքը գտնվում է Չարենցի փողոց 15 հասցեում՝ Երևանի պետական համալսարանի հարևանությամբ:   

Սկզբում այստեղ տեղակայվել է ՀԽՍՀ ԳԱ Նուրբ օրգանական քիմիայի ինստիտուտը, իսկ 1973 թ. շենքը տրամադրվել է ՀԽՍՀ ԳԱ Հնագիտության և ազգագրության ինստիտուտին:

Ուղղանկյուն հատակագծով, եռահարկ կառույց է՝ բոլոր հարկերում երկայնական առանցքով ձգվող միջանցքի և նրա վերջավորություններին ուղղահայաց հատվող միջանցքների շուրջ համախմբված սենյակների համակարգով: Բոլոր ճակատները ճարտարապետական սիմետրիկ լուծումներով են: Արտահայտիչ ձևերով առանձնանում է գլխավոր ճակատը, որի կենտրոնում՝ ընդհանուր հարթությունից ներս, երկու հարկի բարձրությամբ, սյունակամարաշարով ձևավորված նախամուտք-սրահն է՝ մուտքի բացվածքով: Նախամուտքից վերև՝ երրորդ հարկում, գիտաժողովների դահլիճի երկայնքով ձգվող բաց պատշգամբն է:

Գլխավոր ճակատի մշակման կոնստրուկտիվ և դեկորատիվ տարրերից են ռիթմիկ դասավորված պատուհանները, երկրորդ և երրորդ հարկերի տրամատավորված քիվագոտիները, երրորդ հարկի եզրային պատուհանների (երեքական) ռիթմն ընդգծող կամարաշարը: Բակ նայող արևելյան ճակատը ևս ընդհանուր հարթությունից ներս ընկած լուծումով է՝ կենտրոնում բացվող ծառայողական դռնով: Շինանյութը վարդագույն սրբատաշ տուֆն է:

Թեթևակի կատարված նորոգչական աշխատանքները չեն խաթարել շինության կառուցվածքային և արտաքին լուծումները:

Շենքն իր ծավալատարածական հորինվածքով, բարձրությամբ համահունչ է փողոցի կառուցապատմանը: Հորինվածքը խարսխված է ազգային մշակույթի ավանդույթների վրա, կատարված է թամանյանական դպրոցի ճարտարապետության ձևերի օգտագործմամբ: 1950-ական թթ. Երևանը ներկայացնող շինություններից է:   

«Պատմամշակութային ժառանգության գիտահետազոտական կենտրոն» ՊՈԱԿ

Երևանի քաղաքապետարան