ՊԱՏՄԱՄՇԱԿՈՒԹԱՅԻՆ ՇԵՆՔԵՐ

Հատակագծում ուղղանկյուն կառույց է: Երկհարկանի, ոչ բարձր ու նեղ գլխավոր ճակատով նայում է պողոտային: Դեպի տարածքի խորքը ձգվում է կողային մեկհարկանի բաց սրահներով, որոնք ունեն հոնիական օրդերի 12-ական սյուներ և հիշեցնում են վաղ միջնադարյան հայկական ճարտարապետական կառույցները (մասնավորապես՝ Երերույքի բազիլիկան): 

Շենքն ունի 2 մ բարձրությամբ բազալտե որմնախարիսխ, գլխավոր ճակատը լուծված է մոնումենտալ խոշոր ձևերով: Նրա կամարակապ շքամուտքն ավարտվում է եռանկյունաձև ճակտոնով, որը հենվում է դասական օրդերի խոյակների (և սյուների) վրա: 

1987 թ. «Հայարդնախագիծ» ինստիտուտում կազմված նոր նախագծի հիման վրա գլխավոր մասնաշենքի երկու կողմերում ավելացվել է 10 մ լայնությամբ և 6 մ երկարությամբ երկու եռահարկ շենք: 

1992-2018 թ. մայիսին շենքը ծառայել է որպես ՀՀ նախագահի նստավայր, ապա կարճ ժամանակով եղել է ՀՀ վարչապետի նստավայրը։ 2019 թ. մարտից այն վերստին  ՀՀ նախագահի նստավայրն է:

2009-2010 թթ. ճարտարապետ Նարեկ Սարգսյանի նախագծով շենքի առանցքով ետնամասում կառուցվել է նոր, քառահարկ վարչական մասնաշենք: 

Երևանի ավագանու որոշմամբ 2019 թ. ապրիլին ՀՀ նախագահի նստավայրն անվանակոչվել է «Հանրապետության տուն»:                                                                      

ՀՀ նախագահի նստավայրի տարբեր սրահներում ցուցադրվում են հայ անվանի նկարիչներ Հովհ. Այվազովսկու, Փանոս Թերլեմեզյանի, Մարտիրոս Սարյանի, Գևորգ Բաշինջաղյանի, Հակոբ Հակոբյանի և այլոց գործերը: Տարածքի ետնամասում տեղադրված են Տիգրան Բ Մեծ հայոց թագավորի (2000 թ., մարմար, քանդակագործ՝ Լևոն Թոքմաջյան) և Նոյ նահապետի (2000 թ., մարմար, բազալտ, քանդակագործ՝ Լևոն Թոքմաջյան) արձանները, որոնք այստեղ են տեղափոխվել գլխավոր մասնաշենքի առջևից, 2011 թ.: