ՀՈՒՇԱՐՁԱՆՆԵՐ

1987 թ.

Պետ. ցուցիչ՝ 1.6.67.2   

Քանդակագործ՝ Խաչատուր Իսկանդարյան, ճարտարապետ՝ Մելքոն Ավագյան 

Հայ առաջին տպագրիչ, հայկական տպագրության հիմնադիր Հակոբ Մեղապարտի (XV-XVI դդ.) արձանը գտնվում է Իսահակյան փողոցի վրա` Մամուլի կոմիտեի շենքի դիմաց, գազոնում:

Մեղապարտը քանդակված է գրանիտե սրբատաշ որմածքի վրա՝ կանգնած դիրքով, աջ ձեռքը հենել է տպագրական հաստոցին, ձախ ձեռքում բռնել է առաջին հայերեն տպագիր գիրքը՝ աղոթքների ու մաղթանքների «Ուրբաթագիրք» ժողովածուն (1512 թ.):

Քանդակային հորինվածքի ձախ եզրին պատկերված են 1512-1513 թթ. Մեղապարտի հրատարակած հայալեզու հինգ գրքերը, որոնցից ներքև պատկերված է նրա տպանշանը՝ խաչով և լատիներեն D, I, Z, A տառերով: Վերծանվում է Dei Servus Iakobus Zanni Armenius՝ «Աստծո ծառա Հակոբ Ծաննի հայ»: Տպանշանի մոտ արձանագրված է՝ ՀԱՅ ԱՌԱՋԻՆ ՏՊԱԳՐԻՉ. 1512, իսկ որմածքի ստորին մասում՝ ՀԱԿՈԲ ՄԵՂԱՊԱՐՏ:

Թիկունքին արձանագործի անունն է և հուշարձանի ստեղծման տարեթիվը՝

ՔԱՆԴԱԿԱԳՈՐԾ ԽԱՉԱՏՈՒՐ ՄԱՐՏԻՐՈՍԻ ԻՍԿԱՆԴԱՐՅԱՆ, 1987:

Կերտված է կանաչակապտավուն գրանիտից: Ունի 6 x 3,5 մ չափեր:

 «Պատմամշակութային ժառանգության գիտահետազոտական կենտրոն» ՊՈԱԿ

Երևանի քաղաքապետարան