ՊԱՏՄԱՄՇԱԿՈՒԹԱՅԻՆ ՇԵՆՔԵՐ ԵՎ ՎԱՅՐԵՐ

XIX դ. վերջ – XX դ. սկիզբ

Պետ. ցուցիչ՝ 1.6.200.5

Տունը գտնվում է Տիգրան Մեծի պողոտայում։

Երկհարկանի է, ունի թևերի անհավասար երկարությամբ П-աձև հատակագիծ։ Գլխավոր ճակատն արևմտյանն է՝ պողոտայի կողմից։ Սենյակները գլխավոր մասնաշենքի ուղղանկյան մեջ ունեն երկշար դասավորություն։ Այստեղ է գտնվում առանձնատան բակ տանող երթանցը։ Դեպի պողոտա են բացվում բարձակային երեք պատշգամբներ։

Պատուհաններն ուղղանկյուն են. վերինները եզերված են շրջակալներով, հարդարված են ձևավոր բարձակներով և աղեղնաձև ճակտոններով, իսկ պատուհանատակի հարթությունները զարդարված են երկրաչափական զարդաքանդակներով։ Կիսաշրջանաձև կամարակապ բացվածքներն ընդգծում են պողոտայից դեպի շենք և բակ տանող ելումուտի ուղղությունը։

Մուտքն ընդգծվում է կախովի պատշգամբով և եռանկյունաձև ճակտոնով, որն առաջ է գալիս պատի հարթությունից և բարձրանում պսակող քիվից վեր։ Ճակատի դեկորատիվ հարդարանքը կազմված է բարձրաքանդակներով զարդարված որմնախոյակներով հարթ որմնասյուներից, գոտիներից, պարապետի սալերից, ինչպես նաև քիվի և ճակատի դենտիկալներից։ Պատշգամբներն ունեն մետաղյա ճաղեր։

Գլխավոր ճակատը երեսպատված է սև տուֆով։ Ծածկերը հարթ են, փայտյա։