ՕԳՏԱԿԱՐ ՏԵՂԵԿԱՏՎՈՒԹՅՈՒՆ

Ավտոբուսներ, մետրո և տաքսիներ

Երևանը փոքր քաղաք է. այստեղ զբոսնելը հեշտ է և հաճելի: Տեսարժան վայրերի, թանգարանների, սրճարանների և ռեստորանների մեծ մասը գտնվում են կենտրոնում, և Դուք կարող եք շրջել քաղաքի կենտրոնում մեկ ժամում:

«Զվարթնոց» միջազգային օդանավակայանից էքսպրես փոխադրում

Ավտոբուսի առցանց երթուղին (N 201)

Ավտոբուս (N 100)        Զվարթնոց օդանավակայանից դեպի Ֆրանսիայի հրապարակ (Երևանի կենտրոն)

«Elitbus» ընկերությունը կազմակերպում է արագ փոխադրումներ «Զվարթնոց» օդանավակայան:

Միակողմանի երթի արժեքը մեկ անձի համար 300 դրամ է: Վճարումը պետք է կատարել կանխիկ՝ ՀՀ դրամով:

Էքսպրես ծառայությունն աշխատում է յուրաքանչյուր 30 րոպեն մեկ:

Օդանավակայանից կենտրոն և հակառակ մեկնումը տևում է մոտ 20 րոպե:

Ավտոբուսներ և միկրոավտոբուսներ

Աշխատանքային ժամեր՝ 06:00-23:00

Ավտոբուսներն ու միկրոավտոբուսները հանրային տրանսպորտի ամենակիրառվող ձևն են: Անկախ երթուղու հեռավորությունից՝ ուղեվարձը 100 դրամ է` քաղաքի սահմաններում: Կանգառները միմյանց մոտ են: Իսկ եթե չգիտեք՝ ինչպես տեղ հասնել, ուղևորներն ու վարորդն անպայման կօգնեն ձեզ:

Մետրո

Աշխատանքային ժամեր՝ 07:00-23:00

Երևանում գործում է 1 մետրոյի գիծ `10 կայարաններով: Անկախ երթուղու հեռավորությունից, ուղեվարձը 100 դրամ է: Անհրաժեշտ է գնել ժետոն կամ քարտ, որոնք վաճառվում են անմիջապես կայարաններում:

Տաքսի

Երևանում տաքսիները մատչելի են: Դրանք սովորաբար կայանում են մայթերի մոտ՝ սպասելով ուղևորների: Միջին գինն է 100 դրամ՝ 1 կմ-ի համար: Նվազագույն ուղեվարձը 600-1000 դրամ է: Խուսափե՛ք առանց հաշվիչի տաքսիներից. դրանց վարորդներն, ամենայն հավանականությամբ, հավելյալ գումար կփորձեն «կրակել»: Առավել հարմար է, եթե ժամանումից առաջ ներբեռնեք տաքսի ծառայության առցանց հավելված (gg, Utaxi, Yandex Taxi), որին կարող եք կցել բանկային ձեր քարտը:

Մեքենայի վարձույթ

Մեքենայի վարձույթը Երևանով տեղաշարժի ամենատարածված միջոցը չէ, եթե մտադիր եք մնալ քաղաքում: Լուսացույցները շատ են, իսկ աշխատանքային օրերին խցանումներն՝ անխուսափելի, ավտոկայանատեղիներն ու շենքերի բակերը հաճախ գերբեռնված են, ուստի մեքենան կարող է շատ անհարմարություններ պատճառել: Մյուս կողմից, մեքենայի վարձույթը իսկապես հարմար է, եթե որոշեք մեկնել Երևանից դուրս՝ երկրի տարբեր մարզեր:

Հեծանիվներով և էլեկտրոնային սկուտերներով փոխադրում

Ինչպես ամբողջ աշխարհում, այնպես էլ Երևանում ակտիվ կիրառվում է հեծանիվների և էլեկտրական սկուտերների շերինգը՝ առցանց հավելվածների միջոցով (YerevanRide, Mimo Bike, YouDrive Lite): Բայց հիշե՛ք, որ, քաղաքը, ցավոք, դեռ հարմարեցված չէ այս տեսակի փոխադրամիջոցներից օգտվելու համար և չկան հատուկ ուղեգծեր: