ՀՈՒՇԱՐՁԱՆՆԵՐ

1986 թ.

Պետ. ցուցիչ՝ 1.6.141

Քանդակագործ՝ Լևոն Թոքմաջյան

Ճարտարապետ՝ Արթուր Թարխանյան

Գտնվում է Մաշտոցի և Մարշալ Բաղրամյան պողոտաների ու Զորյան փողոցի հանգույցում՝ Մարտիրոս Սարյանի անվան պուրակում: Հեղինակներ՝ քանդակագործ, ՀՀ ժողավրդական նկարիչ Լևոն Թոքմաջյան և ՀԽՍՀ ժողովրդական ճարտարապետ Արթուր Թարխանյան:

Նվիրված է հայ աշխարհահռչակ նկարիչ, նորագույն շրջանի հայկական գեղանկարչության ազգային դպրոցի հիմնադիր Մարտիրոս Սարյանին (1880-1972):

Ուրալյան սպիտակ մարմարից, 5.40 մ բարձրությամբ քանդակը տեղադրված է մոխրագույն բազալտից եռաստիճան պատվանդանի վրա: Վերջինիս ստորին աստիճանի ձախ անկյունում տեղադրված է 1.5 x 1.5 մ չափերով, հավերժության պատկերով գրանիտե սալ, որի մեջ Մ. Սարյանի ինքնագիրն է (ոսկեզօծ լատուն): Միջին աստիճանի աջ անկյունային մասում ռուսերեն լեզվով փորագրված է նկարչի անունը: Քանդակում Սարյանը նստած է վեհաշուք դիրքով, գունապնակը ձեռքին:

Սպիտակ մարմարը պուրակի կանաչի հետ ստեղծում է գունային մեղմ համադրություն՝ ընդգծելով քանդակի հանդիսավոր, պատեթիկ բնույթը:

«Պատմամշակութային ժառանգության գիտահետազոտական կենտրոն» ՊՈԱԿ

Երևանի քաղաքապետարան