ՀՈՒՇԱՐՁԱՆՆԵՐ

1963 թ․ Երևանն ու Կարարան քույր քաղաքներ դառնալու առթիվ Կարարայի քաղաքա­պետ Ֆիլիպո Մարտինելին Երևանին է նվիրում Քրիստոսի արձանի ձեռքերի կրկնօրինակը (քանդակագործ՝ Խիլմա Մադերա), որը քանդակագործ Արա Հարությունյանի միջամտությամբ ձևափոխվում է՝ Քրիստոսի ձեռքերից վերածվելով Բարեկամության ձեռքերի, և տեղադրվում Օղակաձև զբոսայգում։ Ի նշան երախտագիտության՝ Երևանի քաղաքապետ Գրիգոր Հասրաթյանն իր ու երևանցիների անունից 1965 թվականին Կարարա քաղաքին է նվիրում տուֆակերտ «Կենաց ծառ» աղբյուր-հուշարձանը (տեղադրվել է 1967 թ.): Հուշակոթողի ետին մասում գրված է. «Ի նշանավորումն եղբայրության Երեւան Կարրարա 1967 In segno di fraternita Erevan Carrara»: Որոշ ձևափոխումներով հուշարձանի համանուն օրինակը 1965 թ. տեղադրվում է Օղակաձև զբոսայգու Իսահակյան, Մոսկովյան և Տերյան փողոցիների միջև ընկած հատվածում:

Երկու  աղբյուր-հուշարձանների հեղինակներն են մեծանուն ճարտարապետ Ռաֆայել Իսրայելյանը և անվանի քանդակագործ Արա Հարությունյանը:

Հայկական խաչքար հիշեցնող, 3․10 մ բարձրությամբ հուշաղբյուրը կերտված է երևանյան տուֆից: Կենտրոնական կոթողը հարդարված է Իսրայելյանին հատուկ խաղողի մոտիվով. մեջտեղով դեպի վեր ձգված երկու ճյուղերից յուրաքանչյուրի կորության տակ ողկույզ է քանդակված: Ամբողջական հորինվածքը խորհրդանշում է կենաց-ծառը: Վերևում տեղադրված են երկու խոշոր, միաչափ, տարբեր զարդանախշերով վարդակներ: Աջ վարդակի տակ թռչնանման փերի է քանդակված:

Հուշաղբյուրի երկու կողմում տեղադրված, պարուրաձև եղջյուրներով խոյերի քանդակ­նե­րը հիշեցնում են Ջուղայի ավանդական խոյերի քանդակները։ Խոյերը քանդակազարդ են (բուսազարդեր, հեծյալ, ծաղկաքանդակ) և պահպանում են Կենաց ծառը: Ընդհանուր սիմետրիկ հորինվածքում կոմպոզիցիոն ասիմետրիկ ակտիվություն է մտցնում առասպելական թռչնի քնադակը: