ՊԱՏՄԱՄՇԱԿՈՒԹԱՅԻՆ ՇԵՆՔԵՐ

1957-1963 թթ․

Պետ. ցուցիչ՝ 1.9.3

Ճարտարապետ՝ Օնիկ Դոխիկյան

Կոնստրուկտոր՝ Ստասյուկ

Գտնվում է հին Նորքի բարձունքում՝ Գարեգին Հովսեփյան փողոց, 26 հասցեում։ Ճարտարապետ՝ Օնիկ Դոխիկյան, կոնստրուկտոր՝ Ստասյուկ։ Նախագիծը մշակվել և իրականացվել է 1957-1963 թթ.՝ ՀԽՍՀ Կապի մինիստրություն և ՀԽՍՀ Ռադիոհաղորդումների ու հեռուստատեսության պետական կոմիտեի պատվերով։ Նախագծի տեխնոլոգիական և սանիտարատեխնիկական հատվածները մշակվել են Մոսկվայում։ Շինարարությունն իրականացրել է ՀԽՍՀ Շինարարության մինիստրության N 3 տրեստը:

Կենտրոնի առաջին կառույցներն են եղել տեխնիկական կայանի շենքը, ստուդիայի գլխավոր մասնաշենքը: 1970-ական թթ. կինոարտադրության բուռն զարգացման հետ կապված՝ կառուցվել են կինոարտադրության շենքը և դրամատիկական ստուդիան: Այդ ժամանակ տեղադրվել է 200 մ բարձրությամբ հեռուստաաշտարակը, որը 1980-ական թթ․ փոխարինվել է 350 մ բարձրությամբ նոր աշտարակով:

Գլխավոր մասնաշենքն ուղղանկյուն հատակագծով շինություն է, որի կենտրոնում հեռուս­տակենտրոնի՝ 12 մ բարձրությամբ և 600 քառ. մ տարածք զբաղեցնող ընդարձակ սրահն է։ Վերջինիս չորս կողմերում, շենքի 5 հարկերում տեղավորված են դերասանական, խմբագրական, վարչական, տեխնիկական սարքավորումների սենյակները։ Նախասրահի ինտերիերը լուծված է որմնասյուներով և խճանկարներով։ Շենքի անկյունային մասերում տեղադրված աստիճանավանդակները պատված են սպիտակ մարմարով։ Գխավոր ճակատը հարդարված է 16 մ բարձրությամբ հզոր սյուներով։ Կառուցված է Նոյեմբերյանի ֆելզիտից, միդիս շարվածքով։

«Պատմամշակութային ժառանգության գիտահետազոտական կենտրոն» ՊՈԱԿ

Երևանի քաղաքապետարան