ՊԱՏՄԱՄՇԱԿՈՒԹԱՅԻՆ ՇԵՆՔԵՐ

XIX դ. վերջ – XX դ. սկիզբ

Պետ. ցուցիչ՝ 1.6.200.1

Տունը գտնվում է Տիգրան Մեծի (նախկինում՝ Հին Կազարմայի, ապա՝ Հոկտեմբերյան) պողոտա 1 հասցեում:

Եռահարկ է, ունի գրեթե ուղղանկյուն հատակագիծ՝ սենյակների երկշարք դասավորությամբ: Ձգված է հյուսիս-հարավ առանցքով, հյուսիս-արևելքից ունի կարճ ելուստ: Արևմտյան գլխավոր ճակատի հորինվածքային լուծման մեջ ընդգծված են մուտքերը: Ձախից շքամուտքի դուռն է, աջից՝ երթանցը: Բոլոր բացվածքներն ուղղանկյուն են: Ներքևինների առանցքը ամրացնում են մոդուլյոնները: Վերևի հարկի պատուհանները ձևավորված են կոպտատաշ քարերով, ձգագոտին դրանց բաժանում է լուսամուտատակի որմնախորշերից: Այս մոտիվը կրկնվում է նաև 3-րդ հարկում, սակայն այստեղ ձգագոտին վեր է ածվում լուսամուտագոտու: Ճակատի հորիզոնական բաժանումը կազմվում է 2-րդ և 3-րդ հարկերի ժապավենաձև կոպտատաշ քարերով, ընդգծված են միջհարկային ծոփորը և ատամիկների շարքով քիվը:

Կառուցվածքային համակարգում տուֆից միդիս շարվածքով կրող պատերն են: Փողոցի կողմի ճակատում օգտագործված է սրբատաշ տուֆը: Ծածկերը տափակ են, փայտից: Տանիքը թեք է, թիթեղյա:

Ենթարկվել է վերափոխումների:

«Պատմամշակութային ժառանգության գիտահետազոտական կենտրոն» ՊՈԱԿ

Երևանի քաղաքապետարան