ՀՐԱՊԱՐԱԿՆԵՐ ԵՎ ԱՅԳԻՆԵՐ
ԱԼԵՔՍԱՆԴՐ ՄՅԱՍՆԻԿՅԱՆԻ ԱՆՎԱՆ ՀՐԱՊԱՐԱԿ
1980-ական թթ., 2005 թ.
Պետ. ցուցիչ՝ 1.6.131
Քաղաքաշինական համակցումը՝ ճարտարապետ Լևոն Վարդանյանի
Ալեքսանդր Մյասնիկյանի հուշարձան – 1980 թ., ճարտարապետ՝ Ջիմ Թորոսյան, քանդակագործ՝ Արա Շիրազ
Քանդակագործական-ճարտարապետական համալիրը գտնվում է Կենտրոն վարչական շրջանում՝ Ռուսաստանի հրապարակի հարևանությամբ։ Կրում է հայ խորհրդային քաղաքական, պետական, ռազմական գործիչ, ՀԽՍՀ Ժողովրդական կոմիսարների խորհրդի առաջին նախագահ (1921-1922) Ալեքսանդր Մյասնիկյանի (1986-1925) անունը:
Հրապարակը հարում է Երևանի նախկին բերդի տարածքին։ Նախատեսված է եղել Երևանի գլխավոր հատակագծերում, սակայն ձևավորվել է ավելի ուշ։
Հրապարակն ամբողջացնում է Ալեքսանդր Մյասնիկյանի՝ ուղղանկյուն,
ցածր, սրբատաշ պատվանդանին տեղադրված և վարդագույն գրանիտից կերտված արձանը (բարձրությունը՝ 8.6 մ)։ Հուշարձանի հեղինակներն են ճարտարապետ Ջիմ Թորոսյանը և քանդակագործ Արա Շիրազը (1980 թ.)։ Պետական գործիչը զինվորական շինելով է, դիմագծերն ունեն
կերպարային նմանություն: Արձանի թիկունքում վեր են խոյանում փայլեցված գորշ գրանիտե
քանդակազարդ սյուն և հինգ սեղանաձև հուշապատեր: Դրանցից ծայր աջակողմյանի դիմային նիստին
փորագրված են ԱԼԵՔՍԱՆԴՐ ՄՅԱՍՆԻԿՅԱՆ բառերը, իսկ ծայր ձախակողմյանի դիմային նիստին փորագրված
են Եղիշե Չարենցի՝ Ալեքսանդր Մյասնիկյանին նվիրված տողերը.
ՆԱՅԻՐՅԱՆ ԱՐԵՎՆ ԷՐ / ՔՈ ՄԵՋ
/ ԼԵՆԻՆՅԱՆ / ՀՐՈՎ / ՃԱՌԱԳԱԾ. / ԵՂԻՇԵ
/ ՉԱՐԵՆՑ:
Հուշապատերից մեկի մեջ կա բացվածք՝ խաչքար հիշեցնող կոթողով, որի վրա քանդակված
են բուսազարդեր և Խորհրդային Հայաստանի զինանշանը:
Մյասնիկյանի հուշարձանի թիկունում գտնվող այգին, որն իր ծաղկանոցներով ու շատրվաններով
ձգվում է մինչև Ստեփան Շահումյանի անվան հրապարակ, ձևավորվել է 1980-ական թթ.: Հետագայում՝
մոտ երկու տասնամյակ մնացել է անխնամ ու մոռացված: ՀՀ-ում գործող «Վարդանյան
ընտանիք» բարեգործական հիմնադրամի նախաձեռնությամբ և ֆինանսավորմամբ 2018-ից
իրականացվել են այգու հիմնանորոգման աշխատանքները, և վերածնված այգեպուրակային նոր համալիրը
բացվել է 2019 թ. մայիսի 10-ին ու նվիրվել Երևանի հիմնադրման 2800-ամյակին: 2020-2022 թթ. նույն
հիմնադրամը վերանորոգել է նաև վթարային վիճակում գտնվող Մյասնիկյանի
հուշարձանն ու հրապարակը։ Այժմ համալիրային այս երկու տարածքները երևանցիների
ամենասիրված ժամանցի վայրերից են:
Մյասնիկյանի հուշարձանը լուծում է քաղաքաշինական կարևոր խնդիր՝ համաժամանակյա
կառուցված նույնանուն հրապարակը միացնելով 2800-ամյակի այգու և Շահումյան հրապարակի
հետ:
«Պատմամշակութային ժառանգության գիտահետազոտական կենտրոն» ՊՈԱԿ
Երևանի քաղաքապետարան
