ՀՐԱՊԱՐԱԿՆԵՐ ԵՎ ԱՅԳԻՆԵՐ

2010-ական թթ.

Մոսկովյան պուրակը գտնվում է Կենտրոն վարչական շրջանում՝ Ավետիք Իսահակյան, Գևորգ Քոչար և Կորյունի փողոցների միջև։ Սկսվում է Կորյունի փողոցից և Քոչարի փողոցի ձախակողմով ու Հրաչյա Ղափլանյանի անվան դրամատիկական թատրոնի շենքի երկայնքով վայրընթաց ձգվելով՝ հասնում է մինչև «Առագաստ» սրճարան։

Խորհրդային տարիներին այստեղով՝ Գ. Քոչարի փողոցով անցնում էր Երևանի հին ու բարի տրամվայը:

Կառուցվել է ի նշանավորումն հայ-ռուսական բարեկամության:

Պուրակի սկզբնամասում կանգնեցված է «Ամրագրիր քո ապագան» մետաղե քանդակը (քանդակագործ` Դավիթ Մինասյան, 2012 թ.):

Դրամատիկական թատրոնի կողային ճակատի առջև տեղադրված է «Նարդի խաղացողը» բրոնզաձույլ քանդակը (քանդակագործ` Էդուարդ Շախիկյան, 2007 թ.), որն ստեղծելու միտքն առաջադրել է Երևանի թատրոնի և կինոյի պետական ինստիտուտի պրոդյուսերական կուրսի ուսանողներից մեկը:

Տեղանքի թեքության պատճառով պուրակը մշակված է դարավանդաձև հարթակներով, լայնարձակ բազալտե աստիճաններով: Կանաչապատված է:

Պուրակը Կենտրոն վարչական շրջանում կառուցված ամենաերիտասարդ հանգստյան գոտիներից է, որտեղ անցկացվում են նաև տարբեր միջոցառումներ:

 «Պատմամշակութային ժառանգության գիտահետազոտական կենտրոն» ՊՈԱԿ

Երևանի քաղաքապետարան