ՀՐԱՊԱՐԱԿՆԵՐ ԵՎ ԱՅԳԻՆԵՐ
ԴԻԱՆԱ ԱԲԳԱՐԻ ԱՆՎԱՆ ԶԲՈՍԱՅԳԻ
2019 թ.
Գտնվում է Կենտրոն վարչական շրջանում՝ Գլխավոր պողոտայի հյուսիսարևմտյան վերջնամասում՝ դեպի Հայփոստի շենք, Սարյան փողոցի և Մաշտոցի պողոտայի միջանկյալ հատվածում: Ունի շուրջ 20000 քմ տարածք:
Գլխավոր պողոտան նախագծվել է խորհրդային Երևանի առաջին գլխավոր հատակագծում
(1924 թ.), ճարտարապետ Ալեքսանդր Թամանյանի կողմից և պահվել է մայրաքաղաքի հետագա բոլոր
հատակագծերում: Միավորում է միմյանց զուգահեռ Արամի (նախկին Սպանդարյան) և Բուզանդի
(նախկին Սվերդլովի) փողոցները՝ հարավ-արևելքում հասնելով մինչև Վազգեն Սարգսյանի անվան
հանրապետական մարզադաշտ (ըստ թամանյանական նախագծի), իսկ հյուսիս-արևելքում՝ մինչև
Կոնդի զույգ թունելներ, որոնցով խորհրդային տարիներին քաղաքի կենտրոնը կապվել է Հրազդան
գետի հանգստյան գոտու և Մանկական զբոսայգու հետ (այժմ փակված են ու չեն օգտագործվում):
Գլխավոր պողոտայի շինարարությունը որոշ փոփոխություններով իրականացվել է ավելի ուշ,
կառուցապատվել է շատրվաններով, ծաղկանոցներով, գազոններով: Պողոտայի Մաշտոց-Սարյան
հատվածը կառուցվել է 1970-ական թթ., բարձրահարկ շենքերով կառուցապատվել է 2000-2010 թթ.: Հիմնանորոգվել է 2015-2016 թթ., կանաչապատվել է մոտ 10000 նոր
տնկիներով (ծառեր, թփեր, ծաղիկներ), սալահատակվել է, կառուցվել են երգող շատրվաններ:
Քաղաքի երիտասարդ զբոսայգիներից է: Վերակառուցումից հետո, քաղաքային ավագանու 2019
թ. հոկտեմբերի 8-ին որոշմամբ կրում է հայ գրող, հրապարակախոս, հասարակական գործիչ, Հեռավոր Արևելքում, մասնավորապես՝ Ճապոնիայում, Հայաստանի Առաջին Հանրապետության դիվանագիտական ներկայացուցիչ և գլխավոր հյուպատոս, Հայոց ցեղասպանության մասին 9 գրքի հեղինակ, աշխարհում առաջին կին դիվանագետ Դիանա Հովհաննեսի Աբգարի (օրիորդական անուն-ազգանունը՝ Անահիտ Աղաբեկյան, 1859-1937) անունը:
Այգու հիմնանորոգման աշխատանքները ֆինանսավորել է «Տաշիր» ընկերությունների խումբը:
«Պատմամշակութային ժառանգության գիտահետազոտական կենտրոն» ՊՈԱԿ
Երևանի քաղաքապետարան
