ՀՈՒՇԱՐՁԱՆՆԵՐ
ՀՈՒՇԱՐՁԱՆ ՀՈՎՀԱՆՆԵՍ ԱՅՎԱԶՈՎՍԿՈՒ
2003 թ.
Ճարտարապետ՝ Ստեփան Քյուրքչյան
Քանդակագործ՝ Յուրի Պետրոսյան
Հովանավոր՝ «Պրոմեթևս» ՓԲԸ-ի նախագահ
Սենիկ Գևորգյան
Աշխարհահռչակ հայ ծովանկարիչ Հովհաննես Այվազովսկու (Այվազյան) հուշարձանը գտնվում է Մոսկովյան փողոցի սկզբնամասում՝ Երևանի կամերային երաժշտության տան մոտ՝ Օղակաձև զբոսայգում:
Հուշարձանի համար մրցույթ
է հայտարարվել դեռևս 1987 թ., հաղթող է ճանաչվել քանդակագործ Յուրի Պետրոսյանը: Սակայն
Արցախյան ազատամարտի և դրամական միջոցների բացակայության պատճառով աշխատանքն իրականացնել
չի հաջողվել:
Հուշարձանը կանգնեցվել
է միայն 2003 թ. «Պրոմեթևս» ՓԲԸ-ի նախագահ Սենիկ Գևորգյանի հովանավորությամբ: Հանդիսավոր
բացումը տեղի է ունեցել 2003 թ. մայիսի 1-ին: Ս. Գևորգյանը նյութապես օժանդակել է նաև
հայ ականավոր երգահան Արամ Խաչատրյանի հուշարձանի ստեղծմանը (1999 թ., Հայֆիլհարմոնիայի
մեծ դահլիճի մոտ):
Բրոնզաձույլ արձանը պատկերում
է ծովի ալիքների մեջ կանգնած նկարչին՝ գլխաբաց, երկար վերարկուն հագին, աջ ձեռքում՝
վրձին, ձախում՝ ներկապնակ: Տեղադրված է երկաստիճան, գրանիտե, սրբատաշ պատվանդանի վրա,
որի ստորին աստիճանի դիմային նիստին հայերեն և ռուսերեն լեզուներով գրված է՝
ՀՈՎՀԱՆՆԵՍ ԱՅՎԱԶՈՎՍԿԻ:
Արձանի բարձրությունը 3.5 մ է, կշռում է մոտ 2 տոննա:
