ՀՈՒՇԱՐՁԱՆՆԵՐ
ՀՈՒՇԱՐՁԱՆ «Ո՛Չ ՊԱՏԵՐԱԶՄԻՆ» («ԹՈՂ ԵՐԲԵՔ ՊԱՏԵՐԱԶՄ ՉԼԻՆԻ»)
1977 թ.
Պետ. ցուցիչ՝ 1.12.10.4
Ճարտարապետ՝ Ֆելիքս Զարգարյան
Քանդակագործ՝ Վահան Խաչիկյան
Հուշարձանը գտնվում է Ազատության պողոտա, 2 հասցեում՝ Հաղթանակ զբոսայգու ծառուղիներց մեկում: Կերտվել է 1974 թ., տեղադրվել՝ 1977 թ.: Քանդակի հեղինակներն են՝ ճարտարապետ Ֆելիքս Զարգարյանը և վաղամեռիկ քանդակագործ Վահան Խաչիկյանը, ում Խաղաղության պաշտպանության խորհրդային կոմիտեն 1975 թ. հետմահու արժանացրել է հուշամեդալի:
Բազալտով սալարկված
կլոր հարթակի կենտրոնում բարձրանում է Արմավիրի նարնջագույն տուֆից կերտված քանդակագործական
մոնումենտալ հորինվածքը: Այն բաղկացած է բռունցքները սեղմած և բաց ափերը վեր պարզած
ձեռքերից: Հուշարձանի հիմքի կողային քարերից մեկի վրա հայերենով և ռուսերենով գրված
է՝ «ԹՈՂ ԵՐԲԵՔ ՊԱՏԵՐԱԶՄ ՉԼԻՆԻ, ԹՈՂ ՈՉ ՈՔ ՈՐԴԻ ՉԿՈՐՑՆԻ»: Մեկ այլ քարի վրա փորագրված
է քանդակագործի անունը՝ ՎԱՀԱՆ ԽԱՉԻԿՅԱՆ:
Քանդակի բարձրությունը
8,2 մ է, այն նման է կոտրված ճյուղերով ծառի: Հեղինակն այդպես է պատկերացրել
և մեկնաբանել պատերազմը: Հսկայական մերկ, մկանուտ ձեռքերը կարծես աղաղակում են պատերազմի
սարսափների մասին և խաղաղության կոչ են անում: Ձեռքերի արտահայտչականությունն առավել
ընդգծվում է դրանց ողորկության և հիմքի քարերի պակաս սրբատաշության հակադրությամբ:
Հուշարձանը հակապատերազմական քարոզչության վառ օրինակ է:
«Պատմամշակութային ժառանգության գիտահետազոտական կենտրոն» ՊՈԱԿ
Երևանի քաղաքապետարան
