ՊԱՇՏԱՄՈՒՆՔԱՅԻՆ ԿԱՌՈՒՅՑՆԵՐ

Վաղ միջնադար

Պետ. ցուցիչ՝ 1.11.9.2

Եկեղեցին գտնվում է Նորագավթի Սբ Գևորգ եկեղեցուց մոտ 40 մ արևմուտք:                                                                                                            

Հավանաբար ավերվել է 1679 թ. մեծ երկրաշարժից: Պահպանվել են ստորին երկու շարքերը` մոտ 1.5 մ բարձրությամբ:

Եկեղեցին ուղղանկյուն հատակագծով, արևելքում կիսաշրջան խորանով, միանավ, սրահավոր կառույց է: Բարձրանում է եռաստիճան գետնախարսխի վրա: Երկայնական պատերին ներքուստ պահպանված երկու զույգ որմնասյուները ենթադրել են տալիս, որ եղել է թաղածածկ: Հատակը սալարկված է: Միակ մուտքը հարավից է: Սրահի չափերն են՝ 7 x 6.3 մ: Պատերի հաստությունը մոտ 70 սմ է:

Կառուցված է սև և վարդագույն սրբատաշ տուֆով:

Պաշտպանական նկատառումներով եկեղեցու արևմտյան ճակատի դիմաց, հավանաբար, XI-XIII դդ. կառուցվել է անկյունային կիսակլոր աշտարակներ ունեցող հաստ պատ: Եկեղեցու սկզբնական և նորակառույց պատերի միջև եղած տարածությունն ամրացվել է լիցքով:

Եկեղեցու ներսում և շրջակայքում թափված են շարվածքի քարեր, IX-XVI դդ. խաչքարերի բեկորներ, որոնցից մեկն արձանագրված է (XVI-XVII դդ.):

«Պատմամշակութային ժառանգության գիտահետազոտական կենտրոն» ՊՈԱԿ

Երևանի քաղաքապետարան