ՊԱՏՄԱՄՇԱԿՈՒԹԱՅԻՆ ՇԵՆՔԵՐ ԵՎ ՎԱՅՐԵՐ

XIX դ. վերջ

Պետ. ցուցիչ՝ 1.6.200.2

Տունը գտնվում է Տիգրան Մեծի պողոտայում։

Երկհարկանի է՝ նկուղով։ Ունի կարճ թևերով П-աձև հատակագիծ։ Կից սենյակների երկու շարքերը տեղավորված են շենքի երկարական առանցքի երկայնքով և ուղղված են հակառակ կողմեր՝ արևմուտք (փողոց) և արևելք (բակ)։ Գլխավոր մուտքը փողոցի կողմից է ։

Ճարտարապետական հորինվածքում առանձնանում է առաջին հարկը, որտեղ կենտրոնացված են բազմաթիվ գեղարվեստական տարրեր։ Հորինվածքի հիմքը կազմում է ուղղանկյուն բացվածքների շարքը, որոնք ունեն ունկաձև շրջակալներ։ Գոտիներով բաժանված պատուհանների տակ տեղադրված են քիչ դուրս եկած ուղղանկյունաձև հարթություններ։ Հարթ որմնախարսխի մեջ բացված է նկուղի ոչ բարձր դուռը։

Երկրորդ հարկը, առաջինի համեմատ, ունի ավելի պարզ լուծում․ ուղղանկյուն պատուհանները ձևավորված են շրջակալների ուրվագծերով։ Միջհարկային ծածկը ընդգծված է ատամիկներով մշակված քիվով։ Շենքն ավարտվում է պսակող քիվով։ Պատի դեկորատիվ մշակման մեջ ժապավենաձև կիրառված է կոպտատաշ քարը։

Կառուցվածքային համակարգը կազմված է միդիս շարվածքով կրող քարե պատերից։ Փողոցի ճակատում օգտագործված է երևանյան սրբատաշ տուֆ։ Ծածկը հարթ է՝ փայտյա կառուցվածքով։ Տանիքը թեք է՝ մետաղյա ծածկով։