ՀՈՒՇԱՐՁԱՆՆԵՐ

2009 թ.

Պաշտոնական բացումը՝ 2012 թ.

Ճարտարապետ՝ Լևոն Մկրտչյան

Քանդակագործ՝ Սմբատ և Ռաֆիկ Մկրտչյաններ,

Նկարիչ՝ Սերգեյ Մկրտչյան

Հուշարձանը գտնվում է Երևանյան լճի ափին՝ ԱՄՆ-ի դեսպանատնից ոչ հեռու:

Կառուցումը նախաձեռնել է Դամասկոսի հայ համայնքի ներկայացուցիչ Վարուժան Սալաթյանը դեռևս 1997 թ.: Գործին աջակցել են հայաստանաբնակ և սփյուռքահայ (Սիրիա, ԱՄՆ, Ֆրանսիա, Ռուսաստան և այլն) ավելի քան 200 բարերարներ և բարեգործական կազմակերպություններ: Այն համայն հայության երախտագիտության արտահայտությունն է Սիրիայի և ընդհանրապես Մերձավոր Արևելքի արաբական աշխարհին, որն օգնություն է ցուցաբերել Մեծ Եղեռնից մազապուրծ եղած հայերին: Հուշարձանի հեղինակները Լևոն, Սմբատ, Ռաֆիկ և Սերգեյ Մկրտչյան եղբայրներն են:

Ճարտարապետական հորինվածքով եռամաս է՝ արծիվ, բուրգ և Սիրիայի տարածքի պատկեր: Արծվաքանդակը խորհրդանշում է ժողովրդի կամքն ու ոգու ուժը, բուրգը՝ ցեղասպանություն ապրած հայ ժողովրդի վերծնունդը և նոր կյանքի հնարավորությունը Սիրիայում և արաբական մյուս երկրներում։ Սիրիայի տարածքի պատկերումը խորհրդանշում է այդ երկրի և արաբական աշխարհի տարբեր անկյուններում հաստատված հայորդիներին, ինչպես նաև հայ և արաբ ժողովուրդների բարեկամությունը։

Հուշարձանի արևմտյան ճակատին փորագրված է «1915», պատկերված է թռչունների երամ: Հյուսիսարևմտյան կողմում տեղադրված երեք սալիկների վրա հայերենով, արաբերենով, անգլերենով արձանագրված է՝ «ԵՐԱԽՏԻՔԻ ՅՈՒՇԱՐՁԱՆ / ՀԱՅ ԺՈՂՈՎՈՒՐԴԷՆ / ԱՐԱԲ ԺՈՂՈՎՈՒՐԴԻՆ»:

Հարթակի ձախ կողմում նստարան է, որի վրա երեք լեզվով փորագրված է՝ «Ի ՀԻՇԱՏԱԿ ՎԱՐՈՒԺԱՆ ՍԱԼԱԹԵԱՆԻ»:

Մուտքի մոտ տեղադրված է բազալտե ցայտաղբյուր: Հարթակը սալապատված է և ցանկապատված:  

Կառուցված է Արմավիրի կարմիր տուֆից: Հուշակոթողի բարձրությունը մոտ 12 մ է:

«Պատմամշակութային ժառանգության գիտահետազոտական կենտրոն» ՊՈԱԿ

Երևանի քաղաքապետարան