ՀՈՒՇԱՐՁԱՆՆԵՐ
ՀՈՒՇԱՐՁԱՆ «ՀԻՆ ԵՎ ՆՈՐ ՄԱԼԱԹԻԱ»
1973 թ.
Պետ. ցուցիչ՝ 1.7.4
Ճարտարապետ՝ Ֆելիքս Զարգարյան
Հուշարձանը գտնվում է Մալաթիա-Սեբաստիա վարչական շրջանի Նոր Մալաթիա թաղամասի Սբ Աստվածածին եկեղեցուց ոչ հեռու՝ թաղապետարանի մոտ՝ պուրակում:
Հուշարձանը նվիրված է 1915 թ. Հայոց Մեծ Եղեռնի ժամանակ զոհված մալաթիացիների հիշատակին: Թաղամասի բնակիչները, որոնցից շատերը հին Մալաթիայից գաղթածների սերունդներ են, իրենց շրջանն անվանել են Նոր Մալաթիա և կանգնեցրել են կոթողն ի պատիվ հին ու նոր, վերածնված Մալաթիաների:
Բաղկացած է բարդ, աստիճանավոր կոնֆիգուրացիայով երկու պատերից: Շարվածքի համաչափ ելուստները, որոնք կազմում են պատի հարուստ լուսաստվերներով բազմապրոֆիլ բարձրաքանդակը, քարի ծավալի աստիճանական աճը դեպի կենտրոն, աստիճանավոր ուրվապատկերները, շինաքարի վառ կարմիր գույնը ստեղծել են արտահայտիչ պլաստիկ կառուցվածք: Նիստերի վրա դիմաքանդակներ են:
Հուշարձանն ունի եզակի ճարտարապետական հատկանիշ՝ պատերի աստիճանական և հետևողական բացահայտում: Պարուրաձև հորինվածքում ամփոփված դինամիկ բնութագիրը դիտողին ստիպում է պտտվել հուշարձանի շուրջը, նայել այն բոլոր կողմերից, ընկալման ամեն կետից բացում է պատկերի նոր եզրերը, նոր հեռանկարները, իր մասերի նոր հնչեղությունը:
Շարված է կարմիր սրբատաշ տուֆից: Տարածքը բարեկարգվել է 1982 և 2015 թթ.:
«Պատմամշակութային ժառանգության գիտահետազոտական կենտրոն» ՊՈԱԿ
Երևանի քաղաքապետարան
Սեբաստիայի փող.
