ՀՐԱՊԱՐԱԿՆԵՐ ԵՎ ԱՅԳԻՆԵՐ
Խաչքարերի
պուրակը գտնվում է Նալբանդյան և Հանրապետության փողոցների միջև՝ Երևանի մետրոպոլիտենի
«Հանրապետության հրապարակ» կայարանի դիմաց։
Պուրակի
բացումը տեղի է ունեցել 2014 թվականի հոկտեմբերի 11-ին։ Այն ձևավորված է երեք ջրավազաններով,
շատրվաններով, սիզամարգերով և նստարաններով։
Հայոց
ցեղասպանության 100-ամյա տարելիցին նվիրված միջոցառումների շրջանակում, 2015 թվականի
ապրիլի 20-ին, պուրակում բացվել է «Մշակութային եղեռն․ խաչքարերի խորհուրդը» խորագրով բացօթյա ցուցահանդեսը,
որտեղ ներկայացված են Արևմտյան Հայաստանում (Անի, Դերջան, Վասպուրական, Բաղեշ-Բիթլիս)
և Նախիջևանում (Հին Ջուղա, Ճահուկ) ոչնչացված 13 խաչքարերի կրկնօրինակները։
Տասնչորսերորդ
խաչքարը պուրակում տեղադրվել է 2022 թվականին՝ ի նշան Հայաստանում քրիստոնեությունը
պետական կրոն հռչակելու 1700-ամյակի և Հռոմի պապ Հովհաննես Պողոս Բ-ի Հայաստան կատարած
այցի 20-ամյակի։
Պուրակի
սկզբնամասում (Նալբանդյան փողոցի կողմից) տեղադրված են նաև սեպագիր արձանագրություններով
չորս խոշոր կոպտատաշ քարաբեկորներ։ Արձանագրությունները հատվածաբար ընդօրինակված են
Հին Արևելքի հզոր պետություններից մեկի՝ Վանի (Բիայնիլի) թագավորության արքաներ Արգիշտի
Ա-ի (մ.թ.ա. 786–764 թթ.) Խորխոռյան և Սարդուրի Բ-ի (մ.թ.ա. 764–735 թթ.) սեպագիր տարեգրություններից։
Այստեղ ներկայացված են նաև Խորխոռյան տարեգրությունից Էրեբունի ամրոցի (մ.թ.ա. 782
թ.) և Արգիշտիխինիլի քաղաքի (մ.թ.ա. 776 թ.) կառուցման մասին արձանագրությունների կրկնօրինակները։
Շինանյութ
են ծառայել գորշ բազալտը, ինչպես նաև սև, կարմիր և դարչնագույն տուֆը։ Տեղադրված բոլոր
կոթողների քարգործ վարպետը Արտակ Համբարձումյանն է։
Խաչքարերի
պուրակը երևանցիների հանգստի սիրելի վայրերից է:
