ԹԱՏՐՈՆՆԵՐ
Պետ. ցուցիչ՝ 1.6.178.1.1
Ճարտարապետներ՝ Գևորգ Քոչար, Կարո Հալաբյան,
Միքայել Մազմանյան
Թատրոնի շենքը
գտնվում է Աբովյան-Թումանյան, Հին Երևանցի փողոցների միջև ընկած հատվածում՝ Աբովյան փողոց,
7 հասցեում:
Կառուցվել է 1930-1931
թթ.՝ որպես Կառուցողների
ակումբ: Երևանի առաջին կոնստրուկտիվիստական շենքերից է: Կառուցված է փողոցի կարմիր
գծի վրա, ունի հարավ-արևելքից հյուսիս-արևմուտք ուղղությամբ ձգվող ուղղանկյուն հատակագիծ
(109,9 x 10,2 մ)՝ ներքին բակով: Բաղկացած է երկու մասնաշենքից: Առաջին մասնաշենքում
տեղի էին ունենում խմբային պարապմունքներ, կազմակերպվում էին ցուցահանդեսներ, երկրորդում
գործում էր ՀԽՍՀ Ֆիզկուլտուրայի և սպորտի կոմիտեն:
Թատրոնի շենքում առաջին ներկայացումը կայացել է 1933 թ. հունվարին՝
Ալեքսանդր Սպենդիարյանի «Ալմաստ» օպերայով: 1937 թ. շենքը հատկացվել է ռուսական դրամատիկական
թատրոնին: Բացումը տեղի է ունեցել նույն տարվա նոյեմբերի 15-ին՝ Տուր եղբայրների և
Շեյնինի «Առերեսում» պիեսի ներկայացմամբ: Կ. Ստանիսլավսկու անունով է կոչվել 1938 թ.:
Թատրոնի հիմնական խնդիրը հանդիսատեսին ռուս դասական գրականությունը ներկայացնելն է:
Հիմնադիրն ու առաջին գեղարվեստական ղեկավարը եղել է Լևոն Քալանթարը: 1960-ական թթ.
շենքը հիմնովին վերակառուցվել է. փոփոխություններ են կրել հատակագծահորինվածքային և
ճարտարապետական լուծումները, մասնաշենքերի ոճական միասնությունը, ամրացվել են կոնստրուկցիաները:
Միաժամանակ խաթարվել է ճակատների նախնական տեսքը․ մոխրագույն ծեփվածքով որմերը երեսպատվել են բաց օքրայի երանգի ֆելզիտի, ստորին
շարքերը՝ բազալտի սալիկներով: Որոշ ձևափոխումներ է կրել 1990-ական թթ., վերանորոգվել
է 2000 թ.:
Հարավ-արևմուտքից
հավելվել է կցակառույց («Դրագոն գարդեն» ռեստորան):
«Պատմամշակութային ժառանգության գիտահետազոտական կենտրոն» ՊՈԱԿ
Երևանի քաղաքապետարան
