ԹԱՆԳԱՐԱՆՆԵՐ ԵՎ ՊԱՏԿԵՐԱՍՐԱՀՆԵՐ
Պետ. ցուցիչ՝ 1.6.173
Ճարտարապետ՝ Վարազդատ Արևշատյան
Շենքը գտնվում է Պուշկինի փողոց, 70 հասցեում: Կառուցվել է 1935 թ., ՀԿԿ ԿԿ առաջին քարտուղար Աղասի Խանջյանի նախաձեռնությամբ: Հեղինակն է ճարտարապետ Վարազդատ Արևշատյանը: Շենքի առաջին հարկում ապրել և ստեղծագործել է ԽՍՀՄ ժողովրդական նկարիչ, քանդակագործ Արա Սարգսյանը: Կիսահարկը եղել է նրա արվեստանոցը: Երկրորդ հարկում ապրել և ստեղծագործել է ՀԽՍՀ ժողովրդական նկարիչ Հակոբ Կոջոյանը:
1973 թ. շենքն անվանի արվեստագետների ժառանգների ցանկությամբ տրամադրվել է պետությանը: Թանգարանը հիմնվել է 1973 թ. ՀԽՍՀ Մինիստրների խորհրդի 1970 թ. մայիսի 25-ի որոշմամբ: Հայաստանի ազգային պատկերասրահի մասնաճյուղն է:
Ուղղանկյուն հատակագծով, երկայնական առանցքով ձգված երկհարկ կառույց է: Գլխավոր ճակատը դիրքորոշված է դեպի հարավ: Ունի կիսահարկ, որը նախկինում եղել է Արա Սարգսյանի արվեստանոցը, իսկ վերանորոգումից հետո 1-ին հարկի մի մասի հետ քանդակագործի թանգարանի ցուցանմուշների մեծ սրահն է: Կիսահարկի մի մասն էլ օգտագործվում է որպես թանգարանի ֆոնդասրահ: 1-ին հարկում՝ միջանցքից աջ, վարչական սենյակներն են, ձախ՝ ցուցասրահները: Առանձին սենյակում պահվում են քանդակագործի անձնական իրերը:
Երկրորդ հարկը սենյակների դասավորությամբ նման է առաջինին, այն տարբերությամբ, որ Հակոբ Կոջոյանի անձնական իրերը ցուցադրվում են հատուկ խորշերի մեջ, և ցուցասրահը միահարկ է: Ճակատները լուծված են տարբեր չափերի ուղղանկյուն բացվածքների միջոցով: Հյուսիսային ճակատը խուլ է: Արևմտյան ճակատն ունի պատշգամբներ: Հարավային ճակատում շքամուտքն է:
Շենքի բակում տեղադրված են միջնադարյան խաչքար (պետ. ցուցիչ՝ 1.6.172.1), Արա Սարգսյանի աշխատանքներից «Մայր Հայաստան», «Սահակ Պարթև և Մեսրոպ Մաշտոց», «Արտավազդ Բ» քանդակները: Քարե պարսպին ամրացված են «Շեփորահարներ», «Շինարարություն», «Մխիթար Հերացի» հարթաքանդակները:
1972-1973 թթ. շենքի գլխավոր ճակատը երեսպատվել է կարմիր տուֆով, մյուս ճակատները սվաղվել են և ներկվել տուֆագույն, բարեկարգվել է բակը, նորոգվել է պարիսպը: Վերականգնվել է նաև 1981 թ.:
Տուն-թանգարանի մուտքի մոտ՝ մայթի վրա, 1981 թ. տեղադրվել է Հակոբ Կոջոյանի և Արա Սարգսյանի հուշակոթողը (ճարտարապետ՝ Ռոմեո Ջուլհակյան, քանդակագործ՝ Էդուարդ Աղայան, պետ. ցուցիչ՝ 1.6.173.2): Այն ուղղաձիգ պատվանդանի վրա տեղադրված բարդ կոնֆիգուրացիայով, զույգ կամարակապ խորշերով երկկողմանի ծավալ է: Խորշերից մեկի մեջ տեղադրված է Հ. Կոջոյանի, մյուսում՝ Ա. Սարգսյանի դիմաքանդակը: Դիմաքանդակները բրոնզից են, աչքի են ընկնում դիմապատկերային նմանությամբ: Հուշակոթողի ընդհանուր բարձրությունը 2.9 մ է, շինաքարը՝ սրբատաշ բազալտը:
«Պատմամշակութային ժառանգության գիտահետազոտական կենտրոն» ՊՈԱԿ
Երևանի քաղաքապետարան
ԱՇԽԱՏԱՆՔԱՅԻՆ ԺԱՄԵՐ
Երեքշաբթի-շաբաթ՝ 11:00-17:00
Կիրակի՝ 11:00-16:00
Երկուշաբթի ՝ փակ
ՄՈՒՏՔ
Տեղացիներ համար - 400 դրամ
Օտարերկրացիների համար - 500 դրամ
Մինչև 7 տ. երեխաների մուտքը՝ անվճար
ԷՔՍԿՈՒՐՍԻԱՆԵՐ
Հայերեն - 2000 դրամ
Ռուսերեն – 2000 դրամ
