ՀՈՒՇԱՐՁԱՆՆԵՐ

1950 թ.

Պետ. ցուցիչ՝ 1.6.112

Քանդակագործ՝ Սուրեն Ստեփանյան,

Ճարտարապետ՝ Գևորգ Թամանյան

Հուշարձանը նվիրված է XIX դ. հայ մեծանուն գրող, նոր գրականության հիմնադիր Խաչատուր Աբովյանին: Գտնվում է Աբովյան փողոցի վերջնամասում՝ համանուն պուրակում, խոտածածկույթի մեջ: Կերտվել է 1947 թ., տեղադրվել՝ 1950 թ.: Աստիճանաձև գետնախարսխի վրա բարձրացող գրանիտե քառանիստ պատվանդանին 3,65 մ բարձրությամբ բրոնզե անդրին է: Խաչատուր Աբովյանի կեցվածքը հանգիստ է, հայացքը՝ սևեռուն, գիրքը ձեռքին: Պարզ ու զուսպ պլաստիկան կերպարին տալիս են վսեմություն և հանդիսավորություն: Աբովյանի կերպարը բնորոշում է իր ժողովրդի ճակատագրով մտահոգված մտավորականին: Պատվանդանի վերին մասում կա քանդակազարդ ծոփոր, դիմահայաց ճակատին՝ վարդյակ, հակառակ նիստին հայերենով և ռուսերենով փորագրված է հատված Աբովյանի խոսքերից։

Հուշարձանի ընդհանուր բարձրությունն է 9 մ:

Կատարման եղանակով մոտ է XIX դ. կլասիցիզմի քանդակագործությանը:

«Պատմամշակութային ժառանգության գիտահետազոտական կենտրոն» ՊՈԱԿ

Երևանի քաղաքապետարան