ԲԼՈԳ
«Էրեբունի-Երևան 2806». տոնական ու տարաբնույթ միջոցառումներ՝ մայրաքաղաքի սրտում
«Էրեբունի-Երևան 2806» տոնական միջոցառումների մեկնարկը տրվեց Հրազդանի կիրճում կազմակերպված «TriFest» սպորտային փառատոնով:
Փառատոնը ներառում էր մանկական վազք, մեծահասակների վազք, հեծանվով անջատ մեկնարկ (Time Trial) և դուատլոն՝ ապահովելով ակտիվ ժամանց ու մասնակցության հնարավորություն բոլորի համար:
Փառատոնի շրջանակում քաղաքապետ Տիգրան Ավինյանին ներկայացվեց նաև Հրազդանի կիրճում դիտարկվող սպորտային անկյունի նախագիծը: Մարզական հանգստի գոտին նախատեսվում է նվիրել քաղաքին՝ նպաստելով համայնքի սպորտային կյանքի զարգացմանը:
«Էրեբունի-Երևան 2806» տոնական միջոցառումները քաղաքի սրտում իրենց շուրջն էին հավաքել երևանցիներին ու մայրաքաղաքի հյուրերին:
Մայրաքաղաքի տարբեր վայրերում անցկացվեցին տարաբնույթ համերգներ՝ ջազ, ռոք, դասական և էստրադային ժանրերի մեջ։
Համերգներին զուգահեռ անցկացվեցին նաև գարեջրի և գինու փառատոններ, ինչպես նաև փողոցային ֆուտբոլին, բասկետբոլին, ռաունդնեթին, սեղանի թենիսին և այլ սպորտաձևերին նվիրված միջոցառումներ:
Միջոցառումներն ամփոփվեցին եզրափակիչ տոնական համերգով: Հանրապետության հրապարակը լեփ-լեցուն էր քաղաքի տոնը վայելող երևանցիներով ու հյուրերով: Բեմում սիրված արտիստներն էին` սիրված կատարումներով:
