ՀՐԱՊԱՐԱԿՆԵՐ ԵՎ ԱՅԳԻՆԵՐ
Բուսաբանական այգին գտնվում է Աճառյան փողոցում։
Այն Երևանի այգեպուրակային խոշոր համալիրներից է և զբաղեցնում է 80 հա տարածք՝ Քանաքեռի
և Նորքի բարձունքների միջև։ Այգին հիմնադրվել է 1935 թվականին, վերակառուցվել 1945–1950
թվականներին՝ ճարտարապետ Հրայր Իսաբեկյանի նախագծով։
Այգու գլխավոր մուտքը Քանաքեռի կողմից է և լայն
ծառուղով կապվում է Մյասնիկյան պողոտայի կողմից գտնվող մուտքի հետ։
Այգու կենտրոնական մասում գտնվում է փոքր վարդանոց։
Գլխավոր առանցքների հատման կետից հարավ կառուցվել են երկու վարչական շենքեր։ Այգու
ծառուղիները նախագծվել են՝ հաշվի առնելով բույսերի լավ տեսանելիության անհրաժեշտությունը։
Այգու տարածքում ներկայացված են Հայաստանի վայրի,
դեղատու, պտղատու և բազմաթիվ այլ ծառատեսակներ, մշակովի բույսերի վայրի ցեղակիցների
շուրջ 200 տեսակ, հազվագյուտ և անհետացող մոտ 70 բուսատեսակ, ինչպես նաև արևադարձային
և մերձարևադարձային բույսեր։
2008 թվականից այգում գործում է հնէաբուսաբանական
թանգարանը, որտեղ ներկայացված է Հայաստանում բրածո բույսերի կենսաբազմազանությունը՝
ներառյալ թխկիների, կաղնիների և բարդիների նմուշները, ինչպես նաև սոսու ժամանակակից
տերևների ձևերի և չափերի մեծ բազմազանությունը։
