ՀՈՒՇԱՐՁԱՆՆԵՐ

Պետ. ցուցիչ՝ 1.12.10.5

Ճարտարապետ՝ Ռաֆայել Իսրայելյան

Զբոսայգու տուֆակերտ մուտքը Հաղթանակի հուշահամալիրի վերջին կառույցն է՝ կառուցված Ազատության պողոտայի կողմից՝ նախկինից եղած արևմտյան պարսպապատի մեջ, հաղթակամարի տեսքով:

Մուտքը կառուցվել է Ռաֆայել Իսրայելյանի նախագծով, նրա մահից 10 տարի անց՝ 1983 թ.: Ռ. Իսրայելյանը կազմել է էսքիզները, իսկ նրա որդին՝ ճարտարապետ Արեգ Իսրայելյանն ամբողջացրել է նախագիծը և ղեկավարել շինարարությունը։

Հաղթակամարի ուղղանկյուն հիմքով մույթերն իրար են միանում քառակամարով և ճակտոնով: Հորինվածքում օգտագործվել են ազգային ճարտարապետության ձևերն ու զարդարվեստի մոտիվները: Սյուների արևելյան (այգու կողմից) և արևմտյան (դիմային, պողոտայի կողմից) ճակատները ջլատված են հովհարաձև ավարտ ունեցող եռանկյունաձև խորշերով: Ճակտոնի դիմային մասում քանդակված են հուշկապարիկներ, նրանց մեջտեղում՝ սուր և արև, ավելի ներքև՝ առյուծ և վիշապ, բուսական զարդագոտիներ: Արևելյան ճակատին խաղողաքանդակներ են, արծվաքանդակներ, մուրճ ու մանգաղ, բուսական զարդամոտիվներով հարդարված զարդագոտիներ: Այս ճակատի վերին աջ կողմում ճարտարապետի անվան և ազգանված սկզբնատառերն են:

Կառուցված է դարչնագույն տուֆից, քարերը շեղանկյուն են: Աչքի է ընկնում սլացիկությամբ ու վեհությամբ:

«Պատմամշակութային ժառանգության գիտահետազոտական կենտրոն» ՊՈԱԿ

Երևանի քաղաքապետարան