ԵԶԱԿԻ ՎԱՅՐԵՐ

Նեղ, անհարթ, զառիվեր ու ճառագայթաձև փողոցներով Կոնդը Երևանի կենտրոնում գտնվող քաղաքի ամենահին թաղերից է:

Կոնդը Երևանի պատմական հին թաղամաս է քաղաքի արևելյան բարձրադիր մասում՝ Կենտրոն վարչական շրջանում։ Անվանումը ստացել է իր բարձր դիրքի պատճառով. «կոնդ» նշանակում է երկարաձիգ կամ բոլորակ բլուր։ 

Պարսից տիրապետության ժամանակ թաղի անունը փոխվել է և կոչվել «թափաբաշ», որը Կոնդ բառի թարգմանությունն է։ Պարսկական շրջանից Կոնդում պահպանվել է 17-րդ դարի վերջին մզկիթը, որն իր կից դպրոցով դադարել է գործել 1828 թ.: 1915 թ. Հայոց ցեղասպանությունից հետո կիսավեր մզկիթում են ապաստանել գաղթական ընտանիքներ:

Կոնդում է  գտնվում Սուրբ Հովհաննես Մկրտիչ եկեղեցին, որն իր ծխական դպրոցով բոլոր ժամանակներում Կոնդի կարևորագույն կենտրոնն էր: 

Կոնդն ինքնին պատմամշակութային արժեք է: Թաղի առաջամասում ազնվականների երկհարկանի տներն էին: Այստեղով էին անցնում նաև պատմական երկու ջրանցքները՝ Մամռի և Աբուհայաթի: Թաղամասը հայտնի էր նաև պտղատու այգիներով, հատկապես՝ խաղողի: Բակերն ու փողոցները միահյուսած խաղողի վազերն այսօր էլ հիշեցնում են երբեմնի Կոնդը:

Կոնդի տարածքը շուրջ 16 հա է: Չնայած բարձր դիրքին՝ թաղը դեռ 18-րդ դարում ունեցել է թե՛ ոռոգման, թե՛ խմելու ջուր: Սառնորակ աղբյուրները պահպանվել են մինչ օրս:

Հին քաղաքային միջավայրի անբացատրելի ձգողականությամբ Կոնդը այստեղ է բերում երևանցիներին և զբոսաշրջիկներին. ամեն տուն անցյալի ու ներկայի պայքար է խորհրդանշում:

Կոնդը միանշանակ դուր կգա նրանց, ովքեր ցանկանում են զգալ փոքր, բայց հին «քաղաք»-ի շունչը ժամանակակից մայրաքաղաքում: Ճանապարհները ձեզ կտանեն լաբիրինթոս հիշեցնող նեղլիկ փողոցներով, ուր տներն անհամաչափ աղյուսներից են՝ հնաոճ, գունավոր, փայտե դռներով: Այստեղ հիմնականում լանջից սանդուղքաձև իջնող, միահարկ, հաճախ միաձուլված հողաշեն տներ են՝ ընդհանուր բակերով: Պատրաստվեք տեսնել մի յուրահատուկ հին քաղաք, որը տարբերվելու է երբևէ ձեր այցելածներից: