ՀՈՒՇԱՐՁԱՆՆԵՐ
ՄԻՔԱՅԵԼ ՆԱԼԲԱՆԴՅԱՆԻ ՀՈՒՇԱՐՁԱՆ
1965
Պետ. ցուցիչ՝ 1.6.133
Քանդակագործ՝ Նիկողայոս Նիկողոսյան
Հայ
գրող, բանաստեղծ, փիլիսոփա, գրաքննադատ, հրապարակախոս Միքայել Նալբանդյանի
(1829-1866) հուշարձանը գտնվում է Օղակաձև զբոսայգում՝ Խանջյան, Մոսկովյան և Նալբանդյան
փողոցների խաչմերուկում՝ ՀՀ Ազգային անվտանգության շենքի դիմաց։
Հուշարձանի
բացումը տեղի է ունեցել 1965 թ. նոյեմբերի 29-ին։ Արձանը կոփածո բրոնզից է, ունի
4,5 մ բարձրություն, տեղադրված է սև գրանիտե պատվանդանի վրա: Նալբանդյանը պատկերված
է կերպարային նմանությամբ՝ խրոխտ կեցվածքով, ձեռքերը մեջքին դրած, գլուխը բարձր։ Դիմագծերն
անհատականացված են, կերպարը բանաստեղծական է և վեհանձն՝ զուսպ և ամբողջական ձևերի,
հոծ զանգվածայնության և սիլուետային ընդգծվածության շնորհիվ: Արձանի հետնամասում՝ ցածր
եզրապատի վրա փորագրված է ՄԻՔԱՅԵԼ ՆԱԼԲԱՆԴՅԱՆ: Ընդարձակ հարթակն ու պատվանդանը շեշտում
են քանդակի վեհությունը:
Քանդակում
արտահայտված են 1960-ական թթ. խորհրդահայ քանդակագործության պլաստիկ տարրերը՝ կերպարի
ռոմանտիզմ, լակոնիզմ և միջոցների ընդհանրացում:
Միքայել
Նալբանդյանի հուշարձանը Երևանի լավագույն հուշարձաններից է, որը, ներդաշնակորեն միահյուսվելով
շրջապատող բնության հետ, ձևավորում է քաղաքի բանուկ խաչմերուկներից մեկը:
