ԲԼՈԳ

Հայաստանի զբոսաշրջության զարգացման մեջ կարևոր տեղ զբաղեցնող ©Երևանի Գինու Օրեր միջոցառումը կանցկացվի 6-րդ անգամ՝ հունիսի 3-ին, 4-ին և 5-ին Սարյան-Մոսկովյան փողոցների՝ Պուշկինից մինչև Սպենդիարյան խաչմերուկներն ընկած հատվածում և Թումանյան փողոցից մինչև Փարպեցի խաչմերուկ, ժամը 16։00-ից մինչև 23։00։

Մենք մնում ենք հավատարիմ մեր նպատակին՝ խթանել զբոսաշրջությունը Հայաստանում և ապահովել մեր երկրի՝ որպես գինու հնագույն օրրաններից մեկի ճանաչելիությունը:

Գինին սեր է, գինի խմելն՝ արվեստ, իսկ Երևանն այն վայրը, որտեղ պետք է խմել գինի:

Տարածքը բաժանված կլինի մի քանի գոտիների՝

Գինու և գաստրո գոտում ներկայացված են լինելու հայաստանյան և արցախյան գինի  արտադրողները,  ռեստորանները և սրճարանները, որոնց շնորհիվ փառատոնի մասնակիցները անզուգական գինին կհամտեսեն տարբեր ուտեստների համադրությամբ։ Հյուրերը հնարավորություն կունենան փորձարկելու ընդհանուր առմամբ 400+ տեսակ գինի 50+ գինի արտադրողներից։

Երաժշտական գոտի՝ կլինեն 2 բեմ՝ մեկը դասական երաժշտության սիրահարաների համար, մյուսը՝ ռիթմիկ երաժշտության։

Գինեդասեր՝ հայտնի գինեգետներն ու սոմելյեները 3 օրում 15 դասընթաց կանցկացնեն 3 լեզուներով։ Դասընթացը բարձրախոսներով հասանելի և լսելի է լինելու նաև անցորդների համար, մուտքը 2 տոմսակով է, հեռարձակվելու է սոց․ ցանցերի ուղիղ միացմամբ, մեծ էկրանին։

Բարեգործական գոտի՝ զինվորների առողջությամբ կամ կրթությամբ զբաղվող բարեգործական կազմակերպություններին տրամադրում ենք անվճար տաղավարներ հանգանակություններ ստանալու կամ իրենց գործունեությունը ներկայացնելու համար։

Փաթեթների վաճառքի տաղավարներ՝ տեղակայված են լինելու մինչև 10 վաճառքի տաղավարներ, որտեղ վաճառվելու են «Գինին Վայելելու» փաթեթները, տոմսակները, առանձին բաժակները։

Բրենդավորված գինու տաղավար՝ այս տաղավարում վաճառվելու են «Երևանի Գինու Օրերի» բրենդավորված գինիներ, հուշանվերներ, գինու նվեր-քարտեր։

Գինու առաքման տաղավար՝ գինու բոլոր տաղավարներից գնորդներին մատուցվելու է գնված գինին մի քանի օրվա ընթացքում նշված հասցեով առաքելու ծառայություն։

Միջոցառման մուտքն ազատ է բոլորի համար, սակայն ներկայացված գինիներից օգտվելու համար հարկավոր է ձեռք բերել հատուկ «Գինին Վայելեու Փաթեթ» 9000 ՀՀ դրամ արժողությամբ։

Փաթեթն իր մեջ ներառում է՝ կտորե պատյան, գինու բաժակ՝ լոգոյով, գրքույկ 10 կտրոնով, որում ներկայացված կլինի տեղեկատվություն բոլոր մասնակից գինեգործների մասին, ներկայացված կլինեն  զեղչի կտրոններ ռեստորաններից օգվելու համար և այլ հետաքրքիր ու բովանդակային տեղեկատվություն։

Բացի փաթեթներից, առանձին վաճառվելու են լոգոյով բաժակներ՝ 2500 դրամ, և կտրոններ 250 դրամ արժողությամբ: